भानसहिवरे जिल्हा परिषद शाळा जिल्ह्यासाठी आदर्श; जिल्हा क्रीडा अधिकारी ज्ञानेश्वर खुरंगे यांनी गौरवल्या

भानसहिवरे जिल्हा परिषद शाळा जिल्ह्यासाठी आदर्श; जिल्हा क्रीडा अधिकारी ज्ञानेश्वर खुरंगे यांनी गौरवल्या

​शाळेचा कायापालट आणि स्वच्छता पाहून अधिकारी भारावले; लवकरच क्रीडा साहित्य उपलब्ध करून देण्याचे आश्वासन

​नेवासा/भानसहिवरे:

स्थानिक ग्रामस्थ, सजग शाळा व्यवस्थापन समिती आणि कल्पक शिक्षक एकत्र आले तर जिल्हा परिषद शाळेचा कायापालट कसा होऊ शकतो, याचे उत्तम उदाहरण म्हणजे भानसहिवरे येथील जिल्हा परिषद प्राथमिक शाळा होय. जिल्हा क्रीडा अधिकारी ज्ञानेश्वर खुरंगे यांनी नुकतीच या शाळेला भेट दिली असता, शाळेचा सर्वांगीण विकास आणि शिस्त पाहून त्यांनी “भानसहिवरे शाळा ही एक उत्कृष्ट शाळा” असल्याचे प्रशस्तीपत्र दिले.

​या भेटीदरम्यान त्यांच्यासोबत तालुका क्रीडा अधिकारी संतोष वाबळे आणि युवा उद्योजक दत्तात्रय तागड उपस्थित होते.

​स्वागत आणि कौतुक

​शाळेच्या वतीने शाळा व्यवस्थापन समितीचे अध्यक्ष डॉ. संतोष ढवान व शिक्षक महेश देवतरसे यांनी पाहुण्यांचे सहर्ष स्वागत केले. मुख्याध्यापक राजेश जगताप यांच्या मार्गदर्शनाखाली शाळेचा जो भौतिक आणि शैक्षणिक विकास सुरू आहे, त्याची सविस्तर माहिती यावेळी देण्यात आली. विशेष म्हणजे, मुख्याध्यापक जगताप यांनी स्वखर्चातून उभारलेले देखणे ‘मुख्याध्यापक कार्यालय’ पाहून खुरंगे साहेबांनी त्यांचे विशेष कौतुक केले.

​शाळेच्या उपक्रमांची पाहणी

​जिल्हा क्रीडा अधिकाऱ्यांनी शाळेच्या परिसराची बारकाईने पाहणी केली. यामध्ये प्रामुख्याने:

​स्वच्छता: सायंकाळी ६ वाजता भेट देऊनही संपूर्ण शाळा परिसर लख्ख आणि स्वच्छ पाहून अधिकारी भारावून गेले.

​परसबाग: शाळेत फुलवण्यात आलेली परसबाग आणि मुला-मुलींसाठीची स्वतंत्र स्वच्छतागृह व्यवस्था पाहून त्यांनी समाधान व्यक्त केले.

​क्रीडा विकास: साहेबांनी शाळेला स्वतःचे क्रीडांगण तयार करण्याची व विविध स्पर्धांचे आयोजन करण्याची सूचना केली. तसेच, शाळेला लवकरच सर्व आवश्यक क्रीडा साहित्य उपलब्ध करून देण्याचे आश्वासन दिले.

​ग्रामस्थ आणि शिक्षकांचे योगदान

​”शिक्षक आणि ग्रामस्थांच्या इच्छाशक्तीमुळेच शाळेचा चेहरामोहरा बदलला आहे,” असे मत खुरंगे यांनी यावेळी व्यक्त केले. या प्रसंगी पत्रकार अशोक पेहरकर, सचिन गायकवाड यांच्यासह शाळेचे शिक्षक व ग्रामस्थ उपस्थित होते.