🔴 “मी शेवगावकर”चा संडे स्पेशल दणका! MIDC ठेकेदारांच्या निकृष्ट कामाचा मणका मोडला

🔴 “मी शेवगावकर”चा संडे स्पेशल दणका!

MIDC ठेकेदारांच्या निकृष्ट कामाचा मणका मोडला

शेवगाव बसस्थानकातील प्रवाशांना मोठा दिलासा

शेवगाव | प्रतिनिधी : अविनाश देशमुख

दि. 11 जानेवारी 2026 | रविवार

शेवगाव बसस्थानकातील प्रवाशांच्या मूलभूत सुविधांकडे दुर्लक्ष करणाऱ्या MIDC च्या ठेकेदारांच्या निकृष्ट दर्जाच्या कामाविरोधात अखेर जनतेचा आवाज बुलंद झाला आहे. सामाजिक कार्यकर्ते सुनील उर्फ बंडूशेठ रासने व स्वाभिमानी शेतकरी संघटनेचे दत्तात्रय फुंदे यांच्या नेतृत्वाखाली करण्यात आलेल्या ठोस आंदोलनाला मोठे यश मिळाले असून, बसस्थानकातील रॅम्पचे चार इंची मजबूत काँक्रीटीकरणाचे काम प्रत्यक्ष सुरू झाले आहे.

🚍 धुळीच्या साम्राज्यामुळे प्रवाशांचे हाल

मागील वर्षी शेवगाव बसस्थानकातील रॅम्पवर करण्यात आलेल्या निकृष्ट काँक्रीटीकरणामुळे परिसरात प्रचंड प्रमाणात धूळ उडत होती. याचा मोठा फटका दैनंदिन प्रवासी, शाळकरी मुले, ज्येष्ठ नागरिक व महिला प्रवाशांना बसत होता. आरोग्याच्या समस्या, वाहतुकीतील अडथळे आणि अपघाताचा धोका निर्माण झाला होता.

✊ आमरण उपोषणाचा इशारा… आणि ठोस लढा

या अन्यायाविरोधात सामाजिक कार्यकर्ते बंडूशेठ रासने, दत्तात्रय फुंदे, संजय नांगरे, नवनाथ कवडे व दिलीप सुपारे यांनी आमरण उपोषणाचा इशारा देत प्रत्यक्ष उपोषण केले. सातत्यपूर्ण पाठपुरावा, आंदोलन व जनतेच्या सहभागामुळे प्रशासनावर दबाव निर्माण झाला.

🏗️ अखेर प्रशासनाची गंभीर दखल

नागरिकांच्या आंदोलनानंतर एस. टी. व परिवहन विभागाच्या वरिष्ठ अधिकाऱ्यांनी प्रकरणाची गंभीर दखल घेतली. प्रत्यक्ष स्थळ पाहणी करून जुन्या कामात मोठ्या त्रुटी असल्याचे मान्य करण्यात आले. त्यानंतर MIDC ठेकेदाराला तातडीने सुधारणा करण्याचे आदेश देण्यात आले.

🚌 ४०० ते ४५० एसटी फेऱ्यांना दिलासा

शेवगाव बसस्थानकातून दररोज ४०० ते ४५० एसटी बस फेऱ्या होत असतात. नव्याने होत असलेल्या मजबूत काँक्रीटीकरणामुळे प्रवाशांना, विशेषतः शाळकरी मुले व ज्येष्ठ नागरिकांना मोठा दिलासा मिळणार आहे.

🆕 ताजा कलम

विभागीय अधिकाऱ्यांनी पाहणीदरम्यान काही ठिकाणी

काँक्रीटची पातळी अयोग्य असणे

गटारांमध्ये अडथळे निर्माण होणे

पावसाचे पाणी साचण्याची शक्यता

अशा गंभीर त्रुटी निदर्शनास आणल्या. त्यामुळे संबंधित ठेकेदाराला काँक्रीटीकरणातील दोष दूर करून प्रवाशांच्या सोयीसाठी मजबूत व दर्जेदार काम करण्याच्या सक्त सूचना देण्यात आल्या. भविष्यात अशा तक्रारी उद्भवू नयेत यासाठी कामाच्या गुणवत्तेची जबाबदारी MIDC कंपनीवर निश्चित करण्यात आली आहे.

👀 कामाची प्रत्यक्ष पाहणी

नवीन रॅम्पच्या कामाची प्रत्यक्ष पाहणी

सुनील उर्फ बंडूशेठ रासने, दत्तात्रय फुंदे (राष्ट्रवादी काँग्रेस – अजित पवार गट), किरण शिंदे, एस. टी. अधिकारी कमलेश लांडगे तसेच इतर सामाजिक कार्यकर्त्यांनी केली.

🗣️ जनतेचा आवाज = बदलाची ताकद

जनतेच्या प्रश्नासाठी प्रामाणिक लढा दिल्यास यश निश्चित मिळते, हे शेवगाव बसस्थानकाच्या उदाहरणातून पुन्हा एकदा सिद्ध झाले आहे.

✍️ अविनाश देशमुख, शेवगाव

सामाजिक कार्यकर्ता / पत्रकार

📞 9960051755 | 9270442511

📰 खबरनामा न्यूज – सत्य, संघर्ष आणि जनहिताची बाजू