ब्रेकिंग न्यूज:-हैदराबादहून उड्डाणाऱ्या वैज्ञानिक बलूनचा प्रवास अहिल्यानगर जिल्ह्यातही शक्य; प्रशासनाची नागरिकांना सूचना

जिल्हा माहिती कार्यालय, अहिल्यानगर

दि. ३० ऑक्टोबर २०२५

हैदराबादहून उड्डाणाऱ्या वैज्ञानिक बलूनचा प्रवास अहिल्यानगर जिल्ह्यातही शक्य; प्रशासनाची नागरिकांना सूचना

हैदराबाद येथील टाटा मूलभूत संशोधन संस्था (TIFR) यांच्यावतीने ऑक्टोबर ते डिसेंबर २०२५ या कालावधीत वैज्ञानिक संशोधनासाठी हवेतील बलून उड्डाणे करण्यात येणार आहेत. या बलूनपैकी काही बलूनवरील उपकरणे महाराष्ट्रातील विविध भागांमध्ये, त्यात अहिल्यानगर जिल्हा सुद्धा समाविष्ट असल्याने, पडण्याची शक्यता आहे. त्यामुळे जिल्हा प्रशासनाने नागरिकांना सतर्क राहण्याचे आणि सावधगिरी बाळगण्याचे आवाहन केले आहे.

या वैज्ञानिक बलून उड्डाणांना भारत सरकारच्या परमाणु ऊर्जा विभाग आणि भारतीय अंतराळ संशोधन संस्था (ISRO) यांचे सहकार्य लाभले आहे.

ही उड्डाणे हैदराबाद येथील ईसीआयएल परिसरातून करण्यात येणार असून, एकूण दहा बलून आकाशात झेपावतील. या बलूनचा व्यास ५० ते ८५ मीटर असून ते हायड्रोजन वायूने भरलेले असतील. उड्डाणाचा कालावधी रात्री ८ ते सकाळी ६.३० असा राहील.

या बलूनमध्ये बसवलेली वैज्ञानिक उपकरणे सुमारे ३० ते ४२ किलोमीटर उंचीपर्यंत जातील आणि काही तास संशोधन करून पॅराशूटच्या साहाय्याने जमिनीवर उतरतील. वाऱ्याच्या दिशेनुसार ही उपकरणे २०० ते ३५० किलोमीटर अंतर प्रवास करू शकतात. त्यामुळे ती महाराष्ट्र, आंध्र प्रदेश, तेलंगणा आणि कर्नाटक या राज्यांतील विविध भागात उतरू शकतात.

महाराष्ट्रातील औरंगाबाद, बीड, नांदेड, उस्मानाबाद, परभणी, सांगली, सातारा, अहिल्यानगर, वर्धा, चंद्रपूर, गडचिरोली, नागपूर, जळगाव आणि सोलापूर या जिल्ह्यांमध्ये उपकरणे पडण्याची शक्यता असल्याने जिल्हा प्रशासनाने खालील सूचना जारी केल्या आहेत —

1️⃣ ज्या ठिकाणी अशी उपकरणे सापडतील ती हलवू नयेत, उघडू नयेत किंवा छेडछाड करू नये.

2️⃣ उपकरणांवर दिलेल्या संपर्क पत्त्यावर किंवा जवळच्या पोलीस ठाण्यात तसेच तहसील कार्यालयात/जिल्हा प्रशासनाकडे त्वरित माहिती द्यावी.

3️⃣ ही उपकरणे सुरक्षित असली तरी त्यामध्ये संवेदनशील वैज्ञानिक साधने असतात. छेडछाड झाल्यास संशोधनातील महत्वाची माहिती नष्ट होऊ शकते.

संशोधन संस्थेकडून अशा उपकरणांची योग्य माहिती देणाऱ्या नागरिकांना योग्य बक्षीस व खर्च भरपाई दिली जाणार आहे.

या प्रयोगांविषयीची माहिती गावपातळीपर्यंत पोहोचविण्याचे निर्देश महाराष्ट्र शासनाने सर्व जिल्हाधिकाऱ्यांना दिले आहेत.

पहिले बलून उड्डाण ऑक्टोबरच्या चौथ्या आठवड्यात होण्याची शक्यता आहे.

जिल्हाधिकारी, अहिल्यानगर

(जिल्हा माहिती कार्यालयाद्वारे प्रसिद्ध)

📞 संपर्क : ०२४१–२२३००००

📧 Email : dioahmednagar@maharashtra.gov.in