अशोक कारखान्यातील लाखो रुपयांचे भंगार चोरीला; सात महिन्यांनंतरही तपास शून्य!

अशोक कारखान्यातील लाखो रुपयांचे भंगार चोरीला; सात महिन्यांनंतरही तपास शून्य!

शेतकरी संघटनेचे जिल्हाध्यक्ष ऍनिल औताडे यांचा व्यवस्थापन समितीला सवाल

शिरसगाव प्रतिनिधी:

अशोक साखर कारखान्यातील लाखो रुपयांचे भंगार १५ ऑगस्ट २०२४ रोजी चोरीला गेले होते. मात्र, तब्बल सात महिने उलटूनही तपास लागलेला नाही. या दिरंगाईबाबत शेतकरी संघटनेच्या शिष्टमंडळाने साखर आयुक्त, पुणे आणि श्रीरामपूर शहर पोलीस ठाण्याचे निरीक्षक नितीन देशमुख यांना निवेदन सादर केले. शेतकरी संघटनेचे जिल्हाध्यक्ष ऍनिल औताडे यांनी ही माहिती दिली.

संशयास्पद विलंब आणि प्रशासनाच्या भूमिकेवर प्रश्नचिन्ह

शेतकरी संघटनेच्या निवेदनात म्हटले आहे की, चोरीची माहिती मिळताच कारखान्याच्या कार्यकारी संचालकांकडे चौकशी केली असता, त्यांनी चोरीच्या घटनेला दुजोरा दिला. मात्र, पोलिसात तत्काळ तक्रार दाखल केली नाही. अखेर, ९ सप्टेंबर २०२४ रोजी—२४ दिवस उशिराने—कारखान्याचे सुरक्षा अधिकारी बाळासाहेब राऊत यांनी श्रीरामपूर पोलीस ठाण्यात तक्रार नोंदवली. आश्चर्याची बाब म्हणजे, या तक्रारीत चोरीस गेलेल्या मालाचे मूल्य फक्त १ लाख रुपये असल्याचे नमूद करण्यात आले.

कारखान्यातील गैरव्यवहार आणि शेतकऱ्यांवर अन्याय

शेतकरी संघटनेने आरोप केला आहे की, कारखान्याचे स्टोअर आणि अकाउंट विभागाचे सहकार अधिनियम ८९ अंतर्गत ऑडिट झाल्यास मोठ्या गैरव्यवहारांचा पर्दाफाश होईल. ऊस उत्पादकांचे पैसे अद्याप मिळालेले नाहीत, तर कारखान्यातून मोठ्या प्रमाणात आर्थिक अपहार होत आहे. व्यवस्थापनाने कोट्यवधी रुपयांच्या भंगारची विक्री ई-टेंडर किंवा जाहीर निविदा न काढता केली आहे.

सीसीटीव्ही फुटेज आणि तपासाचा अभाव

कारखान्यात सीसीटीव्ही कॅमेरे असतानाही चोरीच्या घटनेचा योग्य तपास झाला नाही. चोरीच्या २४ तासांत तक्रार दाखल करण्याऐवजी २४ दिवस विलंब का करण्यात आला? चोरी गेलेल्या भंगाराची किंमत योग्य पद्धतीने का ठरवली नाही? याबाबत व्यवस्थापनाने पोलिसांना काय मदत केली? या सर्व प्रश्नांची उत्तरे न मिळाल्याने शेतकरी संघटनेने तपासाविषयी शंका उपस्थित केली आहे.

शेतकरी आणि कामगारांमध्ये प्रचंड असंतोष

कारखान्याच्या अध्यक्षांचे राजकीय वजन असल्याने व्यवस्थापनाकडून कामगारांवर अन्याय होत आहे. आठ महिन्यांपासून अनेक कामगारांना वेतन मिळालेले नाही. त्यामुळे शेतकरी आणि कामगारांमध्ये असंतोष पसरला आहे. तालुक्यातील बाजारपेठ ठप्प झाली असून, सहकारातील भ्रष्टाचारावर कोणीच बोलायला तयार नाही.

३० एप्रिलला आंदोलनाचा इशारा

शेतकरी संघटनेने इशारा दिला आहे की, ३० एप्रिल २०२५ रोजी अक्षय तृतीयेला पोलीस प्रशासनाच्या दालनात शेतकरी आणि कामगार उपोषणास बसतील. यासाठी संपूर्ण जबाबदारी श्रीरामपूर मतदारसंघाचे आमदार आणि प्रशासनावर राहील.

📌 गणेश सहकारी साखर कारखान्याकडे फक्त साखर निर्मिती असताना मागील वर्षी तीन हजार रुपये प्रति टन दर दिला परंतु अशोक कारखान्याकडे साखर निर्मिती व्यतिरिक्त को-जन व इथेनॉल निर्मितीचे कारखान्याला नफा मिळवून देणारे प्रकल्प असतानाही गणेशपेक्षा तीनशे रुपये प्रति टन कमी दर दिला. म्हणजेच अशोकने एकूण मागील वर्षी प्रति टन आठशे रुपये कमी देऊन ऊस उत्पादकांची फसवणूक केली आहे.

 

✍️ अनिलराव औताडे, जिल्हाध्यक्ष शेतकरी संघटना

 

– प्रतिनिधी, खबरणामा न्यूज