📰 खबरनामा न्यूज | विशेष वृत्त जलसंपदाकडून भंडारदर्‍याचे उन्हाळी आवर्तन केव्हा? – जिल्हाध्यक्ष अनिल औताडे यांचा सवाल

📰 खबरनामा न्यूज | विशेष वृत्त

जलसंपदाकडून भंडारदर्‍याचे उन्हाळी आवर्तन केव्हा? – जिल्हाध्यक्ष अनिल औताडे यांचा सवाल

पाणी मागणी अर्जानंतर 21 दिवस उलटले, तरीही नियोजन नाही – शेतकऱ्यांचा संताप

शिरसगाव प्रतिनिधी :-

भंडारदरा सिंचन प्रणालीच्या उन्हाळी आवर्तनासाठी नमुना क्रमांक ७ पाणी मागणी अर्जाची मुदत २७ मार्च २०२६ रोजी संपली आहे. या मुदतीत लाभधारक शेतकऱ्यांनी पाणीपट्टी भरून नियमानुसार अर्ज सादर केले आहेत. मात्र अर्जाची अंतिम तारीख संपून जवळपास २१ दिवस उलटूनही जलसंपदा विभागाकडून उन्हाळी आवर्तन क्रमांक १ बाबत कोणतेही ठोस नियोजन जाहीर करण्यात आलेले नाही.

यासंदर्भात पाटबंधारे विभागाचे उपकार्यकारी अधिकारी श्री. संजय कलापुरे यांच्याशी संपर्क साधला असता, “शेतकऱ्यांकडून पुरेशी पाणी मागणी झालेली नाही,” असे कारण पुढे करण्यात आले. वडाळे पाटबंधारे उपविभाग, श्रीरामपूर अंतर्गत सुमारे ५०० हेक्टर क्षेत्रासाठी पाणी मागणी अर्ज दाखल झाले असून, आवर्तनासाठी किमान २००० हेक्टर मागणी आवश्यक असल्याचे सांगण्यात आले.

मात्र वास्तवात गेल्या १५ वर्षांपासून भंडारदरा सिंचन प्रणालीमध्ये अर्जित पाणी व प्रत्यक्ष वापर यामध्ये मोठी तफावत दिसून येत आहे. कालवा पातळीवर कार्यरत असलेल्या काही कर्मचाऱ्यांकडून अनधिकृत मदतनिसांच्या माध्यमातून बिगर अर्जदारांना ‘ब्लॅक’ने पाणी पुरवठा करून आर्थिक व्यवहार केल्याचे आरोप सातत्याने होत आहेत. याशिवाय गाव तळी, शेततळी तसेच शिरपूर पॅटर्नसाठीही अनधिकृतरित्या पाणी विक्री केली जात असल्याचे चित्र आहे.

दरम्यान, गोदावरी खोरे विकास महामंडळाकडून सिंचनासाठी पाणीपट्टी दरात दुपटीने वाढ करण्यात आली आहे. यामुळे नियमीत अर्ज करणाऱ्या शेतकऱ्यांवर अन्याय होत असल्याची भावना व्यक्त होत आहे. या सर्व बेकायदेशीर व अव्यवस्थित कारभारामुळे अनेक शेतकऱ्यांनी पाणी अर्ज भरण्याकडे पाठ फिरवली असल्याचेही स्पष्ट होत आहे.

शेतकरी संघटनेचे जिल्हाध्यक्ष अनिल औटाडे यांनी प्रसिद्धीपत्रकाद्वारे जलसंपदा विभागाकडे तीव्र नाराजी व्यक्त करत, पाणी अर्ज भरलेल्या शेतकऱ्यांना तात्काळ पाणी देण्यासाठी उन्हाळी आवर्तन सुरू करण्याची मागणी केली आहे. पाट पाण्यावर अवलंबून असलेल्या शेतकऱ्यांनी मोठ्या प्रमाणावर चारा व ऊस पिकांची लागवड केली असून, विहिरी व बोअरवेल्सची पाण्याची पातळीही मोठ्या प्रमाणात घटली आहे.

गेल्या दोन वर्षांपासून पाट पाण्याचे तुलनेने चांगले नियोजन झाल्यामुळे शेतकऱ्यांमध्ये पाटबंधारे विभागाविषयी विश्वास निर्माण झाला होता. तसेच, राज्य शासनाने सक्तीच्या वसुलीला स्थगिती दिलेली असतानाही वडाळे उपविभागातील शेतकऱ्यांनी ९५ टक्के पाणीपट्टी भरून सहकार्य केले आहे.

अशा परिस्थितीत जलसंपदा विभागाने सर्व बाबींचा गांभीर्याने विचार करून, शेतकरी हा केंद्रबिंदू ठेवत तातडीने उन्हाळी आवर्तन सुरू करावे, अशी मागणी अनिल औटाडे यांनी केली आहे.