📰 महाधन व समर्थ साखर कारखान्याच्या संयुक्त विद्यमाने वाकडी येथे शेतकरी मेळावा – ऊस खत व्यवस्थापनावर मोलाचे मार्गदर्शन

📰 महाधन व समर्थ साखर कारखान्याच्या संयुक्त विद्यमाने वाकडी येथे शेतकरी मेळावा – ऊस खत व्यवस्थापनावर मोलाचे मार्गदर्शन

वाकडी (प्रतिनिधी):

शेतकऱ्यांच्या शेतीसाठी वरदान ठरलेली महाधन खत कंपनी आणि स्वामी समर्थ साखर कारखाना यांच्या संयुक्त विद्यमाने वाकडी (ता. नेवासा) येथे नुकताच एक शेतकरी मेळावा आयोजित करण्यात आला. हनुमान मंदिर प्रांगणात पार पडलेल्या या मेळाव्याचा प्रमुख उद्देश ऊस खत व्यवस्थापन व संगोपनाबाबत मार्गदर्शन देणे हा होता.

कार्यक्रमाचे अध्यक्षस्थान अंकुश पाटील काळे यांनी भूषविले. यावेळी प्रगतशील शेतकरी संत भाऊ गायकवाड, वाकडीचे माजी सरपंच संभाजी काळे, जालिंदर काळे, पांडुरंग काळे गुरुजी (संचालक, शिक्षक सहकारी बँक) नरेंद्र काळे शेतकरी संघटना तसेच वाकडी गावातील अनेक मान्यवर ग्रामस्थ आणि शेतकरी मोठ्या संख्येने उपस्थित होते.

या मेळाव्यात समर्थ साखर कारखान्याचे व्यवस्थापक माननीय राजेंद्र काळे साहेब यांनी चालू गाळप हंगामाचे नियोजन, ऊस लागवडीतील अडचणी, त्यावरील उपाययोजना आणि कारखान्याचे शेतकरी हिताचे धोरण याबाबत सविस्तर मार्गदर्शन केले.

महाधन खत कंपनीचे बेरड साहेब व्यवस्थापक यांनी शेतकऱ्यांना आधुनिक शेतीत योग्य खत वापराचे तंत्रज्ञान, महत्त्व, मृदा व्यवस्थापन खतांचे संतुलित प्रमाण आणि उत्पादनवाढीसाठी आवश्यक बाबींचे प्रबोधन केले. “खताचा अधिक वापर न करता, योग्य नियोजनातून चांगले उत्पादन मिळवता येते” यावर त्यांनी भर दिला.

शेतकऱ्यांनी ऊस उत्पादन, कारखाना दर, व खताच्या गुणवत्ते संदर्भात विविध प्रश्न विचारले. या प्रश्नांना कारखान्याचे व्यवस्थापक राजेंद्र काळे साहेब यांनी समर्पक व समाधानकारक उत्तरे दिली.

कार्यक्रमात शेती अधिकारी लंघे साहेब यांनीदेखील उपस्थित राहून शेतकऱ्यांना मार्गदर्शन केले.

कार्यक्रमाच्या यशस्वीतेसाठी समर्थ साखर कारखान्याचा सर्व स्टाफ, वाकडी ग्रामपंचायतीचे चेअरमन, सरपंच, संचालक व पदाधिकारी यांनी विशेष मेहनत घेतली.

हा मेळावा केवळ मार्ग दर्शना साठीच नव्हे, तर शेतकऱ्यांच्या अडचणी समजून घेऊन योग्य निर्णय घेण्यासाठी एक संवाद मंच ठरला.

—

📝 शेतकरी हिताचे महत्त्वाचे निर्णय:

ऊस पिकासाठी मृदास्वास्थ्य तपासणीला प्राधान्य देणे

रासायनिक खतांचे योग्य नियोजनावर भर

जास्त उत्पादनासाठी सेंद्रिय व सूक्ष्म अन्नद्रव्यांचे महत्त्व

कारखान्याच्या आगामी धोरणात शेतकऱ्यांचा सक्रिय सहभाग

—

ही बातमी ‘Khabarnama News’ तर्फे सादर केली असून, शेतकरी हिताच्या दृष्टीने अशा मेळाव्यांचा व्यापक लाभ व्हावा हीच अपेक्षा!