📰 शेवगावच्या मारुतराव घुले पाटील जिनिंग येथे कार्यकर्त्यांचा स्नेहमेळावा संपन्न

📰 शेवगावच्या मारुतराव घुले पाटील जिनिंग येथे कार्यकर्त्यांचा स्नेहमेळावा संपन्न

घुले परिवाराच्या उपस्थितीत कार्यकर्त्यांची एकजूट; अनुपस्थित नगरसेवकांमुळे चर्चेला उधाण

[ अविनाश देशमुख, शेवगाव ]

शेवगाव तालुक्यातील मारुतराव घुले पाटील जिनिंग येथे दिनांक ३ एप्रिल रोजी सकाळी १०:०० वाजता कार्यकर्त्यांचा स्नेहमेळावा आयोजित करण्यात आला होता. कार्यक्रमाच्या अध्यक्षस्थानी डॉ. नरेंद्र पाटील घुले होते.

या मेळाव्यास तालुक्यातील सर्व आजी-माजी पदाधिकारी, सरपंच, उपसरपंच, सोसायट्यांचे चेअरमन, आजी-माजी संचालक तसेच विविध क्षेत्रातील कार्यकर्ते मोठ्या संख्येने उपस्थित होते.

कार्यक्रमास लोकनेते मारुतरावजी घुले पाटील, ज्ञानेश्वर सहकारी साखर कारखान्याचे अध्यक्ष मा. आ. डॉ. नरेंद्र घुले पाटील, अहिल्यानगर जिल्हा मध्यवर्ती बँकेचे अध्यक्ष मा. आ. चंद्रशेखर घुले पाटील तसेच शेवगाव पंचायत समितीचे सभापती डॉ. क्षितिज घुले पाटील यांची प्रमुख उपस्थिती होती. या सर्व मान्यवरांचे स्वागत शेवगाव नगरपरिषदेच्या नवनिर्वाचित नगरसेवकांनी केले.

या वेळी राजेंद्र ढमढेरे (मुंगी), ॲड. अनिल मडके (शहरटाकळी), राजाजी बुधवंत (निंबे नांदूर), भाऊराव भोंगळे (बोधेगाव), काकासाहेब नरवडे (सुसरे, पाथर्डी) यांच्यासह कार्यकर्त्यांनी आपले मनोगत व्यक्त केले. संघटनेतील आलेली मरगळ दूर करून कार्यकर्त्यांमधील आपसी वाद नेतृत्वाला फटका बसणार नाही, यासाठी आत्मपरीक्षण करण्याची गरज व्यक्त करण्यात आली.

कार्यक्रमाचे सूत्रसंचालन संजय कोळगे व प्रा. दीपक कुसळकर यांनी केले.

कार्यक्रमास माजी संचालक निवृत्ती मामा दातीर, माजी जि.प. सदस्य मोहनराव देशमुख, व्यापारी मनीष बाहेती, कॉन्ट्रॅक्टर फुलचंद रोकडे, अरुण पाटील लांडे यांच्यासह शेकडो कार्यकर्ते उपस्थित होते.

कार्यक्रमाचा समारोप छत्रपती शिवाजी महाराज यांच्या पुण्यतिथीनिमित्त आदरांजली वाहून करण्यात आला.

ताजा कलम

कार्यक्रमात नवनिर्वाचित नगरसेवकांनी जिल्हा सहकारी बँकेचे अध्यक्ष चंद्रशेखर घुले पाटील यांचा सत्कार केला. त्यावेळी नगरपालिकेत कारभार करताना परस्पर विरोधी भूमिका घेणारे दोन नगरसेवक अनुपस्थित राहिल्याने त्यांच्या अनुपस्थितीची चर्चा उपस्थितांमध्ये होती.

✍️ अविनाश देशमुख, शेवगाव

सामाजिक कार्यकर्ता / पत्रकार