🚨 ब्रेकिंग न्यूज | खबरनामा न्यूज 🚨 “महाराष्ट्राचा कोहिनूर हिरा हरपला…” – अजितदादा पवार यांना शिरसगावात अश्रूंनी निरोप

🚨 ब्रेकिंग न्यूज | खबरनामा न्यूज 🚨

“महाराष्ट्राचा कोहिनूर हिरा हरपला…” – अजितदादा पवार यांना शिरसगावात अश्रूंनी निरोप

राज्याचे उपमुख्यमंत्री अजितदादा पवार यांच्या आकस्मिक निधनाने संपूर्ण महाराष्ट्रावर शोककळा पसरली आहे. अचानक घडलेल्या विमान अपघातामध्ये त्यांच्या निधनाची बातमी समजताच केवळ महाराष्ट्रच नव्हे तर संपूर्ण देश हादरून गेला आहे.

या दुःखद घटनेच्या पार्श्वभूमीवर नेवासा तालुक्याचे आमदार विठ्ठलराव लंघे पाटील यांच्या नेतृत्वाखाली शिरसगाव येथे शोकसभेचे आयोजन करण्यात आले. शिरसगाव येथील जगदंबा माता देवी मंदिरात ही शोकसभा पार पडली. यावेळी संपूर्ण गावात कडकडीत बंद पाळण्यात आला असून समस्त ग्रामस्थ मोठ्या संख्येने उपस्थित होते.

शोकसभेत बोलताना आमदार लंघे पाटील म्हणाले की, अनेक वर्षांच्या खस्ता खात अजितदादांसारखे नेतृत्व तयार झाले होते. एवढे मोठे नेतृत्व आपल्याला सोडून जाईल असे कधी वाटले नव्हते, मात्र नियतीपुढे कोणाचेच चालत नाही. आमदारकीच्या कामाच्या माध्यमातून अनेक वेळा अजितदादांशी संपर्क आला. परखड नेतृत्व, कामाला प्राधान्य देणारी भूमिका आणि सर्वसामान्यांशी थेट नातं जपणारा नेता म्हणून अजितदादांची ओळख होती. त्यांच्या जाण्याने आज महाराष्ट्र पोरका झाला असल्याची भावना त्यांनी व्यक्त केली.

आमदार लंघे यांनी काल बारामती येथे जाऊन उपमुख्यमंत्री अजितदादा पवार यांच्या पार्थिवाचे अंतदर्शन घेत श्रद्धांजली अर्पण केली.

विद्या प्रतिष्ठान बारामतीच्या माध्यमातून हजारो विद्यार्थ्यांचे भविष्य घडवणारे, पिंपरी-चिंचवडसह महाराष्ट्रातील प्रत्येक जिल्ह्यात विकासाची ठळक छाप उमटवणारे, पायाभूत सुविधा, उद्योग, सिंचन, शिक्षण आणि रोजगाराच्या संधी निर्माण करणारे अजितदादा पवार हे केवळ सत्तेतील नेते नव्हते तर रचनात्मक विचारातून विकास घडवणारे धुरंधर नेतृत्व होते. अनेक सर्वसामान्य कार्यकर्त्यांना न्याय देत पदाची सुवर्णसंधी देणारे आणि ग्रामीण जनतेशी नाळ जपणारे नेता म्हणून त्यांची ओळख होती. त्यांच्या अकाली जाण्याने महाराष्ट्राने आपला एक कोहिनूर हिरा गमावला असून ही पोकळी दीर्घकाळ भरून निघणार नाही, अशी भावना सर्वत्र व्यक्त होत आहे.

👇👇येथे लिंक ला क्लिक करून खबरनामा युट्युब चॅनेल ची बातमी पहा अखेरचा निरोप देतानी टिपलेले क्षण👇👇

या शोकसभेच्या निमित्ताने आमदार विठ्ठलराव लंघे पाटील यांच्याबाबतही उपस्थितांमधून एक भावना व्यक्त होत होती की, जिल्हा परिषद अध्यक्षपदासाठी सिंहाचा वाटा मिळेल असा शब्द त्यांनी दिला असून शब्द पाळणारा नेता म्हणून त्यांची संपूर्ण महाराष्ट्रात ओळख आहे. त्यांनी कधी कोणालाही फसवले नाही, दिलेला शब्द नेहमी पूर्ण केला. जे शक्य नसेल त्यासाठी ते स्पष्टपणे ‘नाही’ म्हणतात, पण कधीही खोटे आश्वासन देत नाहीत. कधी कधी त्यांच्या स्वभावामुळे लोकांना आश्चर्य वाटले, मात्र त्यांनी स्वभाव कधी बदलला नाही. कारण खोटं बोललं तर तात्पुरता फायदा मिळतो, पण खरं बोलल्याने जरी राग आला तरी तो शेवटपर्यंत खरा असतो—अशी भावना आज ग्रामस्थ, कार्यकर्ते आणि नागरिकांमधून व्यक्त होत आहे.