🗳️ बेलपिंपळगाव गटात निवडणुकीच्या पार्श्वभूमीवर तारेवरची कसरत!

🗳️ बेलपिंपळगाव गटात निवडणुकीच्या पार्श्वभूमीवर तारेवरची कसरत!

“कभी खुशी कभी गम” — उमेदवारीवर गावपातळीवर चर्चेला वेग

निवडणूक वार्ता नेवासा( प्रतिनिधी)

नेवासा तालुक्यातील बेलपिंपळगाव जिल्हा परिषद गटात आगामी निवडणुकीची चाहूल लागल्याने सध्या राजकीय समीकरणांना वेग आला आहे. या गटात माननीय आमदार विठ्ठलराव लंघे यांच्या नेतृत्वावर आधारित मोठा गट सक्रिय असून, अनेक निष्ठावंत कार्यकर्ते उमेदवारीसाठी इच्छुक आहेत.

या गटात सध्या चर्चेत असलेल्या इच्छुकांमध्ये शिवाजी मते (प्रवरा संगम) हे माननीय आमदार लंघे यांचे खंदे समर्थक म्हणून अग्रभागी आहेत. त्यांनी गेल्या 40 वर्षांपासून आमदार लंघे यांच्याबरोबर प्रामाणिकपणे काम केले असून, भाऊंसाठी त्यांनी अहोरात्र पायाला भिंगरी लावून प्रचार केला आहे. संयमी, शांत आणि नियोजनबद्ध पद्धतीने काम करणारे हे निष्ठावंत कार्यकर्ते “कोर कमिटी” मध्ये निर्णय घेणारे महत्त्वाचे नेते म्हणून ओळखले जातात.

तसेच गोगलगावचे योगेश मस्के हे पूर्वी आदरणीय यशवंतराव गडाख यांचे कार्यकर्ते होते, मात्र सध्या ते माननीय आमदार लंघे यांच्या गटाशी जोडले गेले असून, त्यांनी उमेदवारीची इच्छा व्यक्त केली आहे. त्यामुळे गडाख गटातून लंघे गटात झालेल्या या कलांतराची चर्चा सध्या गडाख आणि लंघे यांच्या कार्यकर्त्यांमध्ये मोठ्या प्रमाणात रंगली आहे.

त्याचबरोबर राजेंद्र मते (गोगलगाव), राजेंद्र कदम (प्रवरा संगम) आणि अजय साबळे हे देखील उमेदवारीसाठी तयारीत आहेत.

बंडोपंत चौगुले (बेलपिंपळगाव) हे शेतकरी संघटनेतून सक्रिय आहेत व त्यांनी स्थानिक पातळीवर शेतकऱ्यांच्या प्रश्नांवर सातत्याने आवाज उठवला आहे.

शुभम उगले (टोका) आणि अमोल कोकणे (संचालक, अशोक कारखाना) हे देखील युवा नेतृत्व म्हणून आपली पकड मजबूत करण्याच्या प्रयत्नात आहेत.

वसंतराव कांगुणे (अदिक गट) हे जुने कार्यकर्ते असून त्यांच्या नावाचाही उल्लेख चर्चेत आहे.

याशिवाय नवनाथ साळुंखे (गिडेगाव) हे आदरणीय आमदार लंघे यांचे खास विश्वासू कार्यकर्ते आहेत. त्यांच्या योगदानाचे महत्त्व मोठे आहे आणि ते आमदार साहेबांचा अंतिम शब्द मानतात. त्यांनी पक्षासाठी जे निर्णय आमदार घेतील ते मान्य आहेत. त्यांची इच्छा आहे की संधी मिळाली तर निवडणूक लढवण्याची, आणि ही चर्चा गावपातळीवर जोरात सुरु आहे.

याचबरोबर श्री कडूबाळ कर्डिले पाटील हे यशवंतराव गडाख साहेबांचे विश्वासू कार्यकर्ते मानले जातात. आमदार लंघे यांच्याशी त्यांचे सौहार्दपूर्ण संबंध असले तरी, या निवडणुकीत नात्यागोत्यापेक्षा प्रामाणिकपणाला आणि पक्षनिष्ठेला अधिक महत्त्व मिळेल, असा अंदाज वर्तवला जात आहे.

गटात तिकीट मिळवण्यासाठी इच्छुकांची संख्या मोठी आहे. मात्र, यात काही खरे निष्ठावंत कार्यकर्ते डावलले जातात की काय, हा प्रश्न कार्यकर्त्यांमध्ये चर्चेचा विषय ठरला आहे. येणाऱ्या काळात कोण पक्षासाठी किती योगदान देतो, आणि कोणाची नैतिक भूमिका अधिक मजबूत ठरते, हेच तिकीटाच्या शर्यतीत निर्णायक ठरणार आहे.

बेलपिंपळगाव गट हा राजकीय दृष्ट्या अत्यंत संवेदनशील मानला जातो. त्यामुळे आगामी निवडणुकीत गटात तारेवरची कसरत होण्याची शक्यता नाकारता येत नाही. काहींसाठी ही परिस्थिती “कभी खुशी, कभी गम” अशी असू शकते.

सध्या गावपातळीवर उमेदवारी संदर्भात चर्चा जोरात सुरु असून, प्रत्येकजण आपापल्या कार्याचा हिशोब मांडत आहे. अखेर आमदारांचे खरे निष्ठावंत आणि पक्षनिष्ठ कार्यकर्ते यांनाच न्याय मिळतो का, हे येणाऱ्या काही दिवसांत स्पष्ट होईल.

तशी इच्छुकांची संख्या फार मोठी आहे, पण सध्या मी चर्चेत घेतलेले निवडक लोक हेच गावपातळीवरील चर्चेचा केंद्रबिंदू ठरले आहेत.

📊 निवडणूक विश्लेषण – बेलपिंपळगाव गट

✍️ नरेंद्र पाटील काळे, खबरनामा न्यूज नेटवर्क