पिचडगावच्या ‘मुक्ताई बारव’ला ऐतिहासिक वैभवाचे नवे रूप; आमदार लंघे पाटील यांच्या हस्ते लोकार्पण

पिचडगावच्या ‘मुक्ताई बारव’ला ऐतिहासिक वैभवाचे नवे रूप; आमदार लंघे पाटील यांच्या हस्ते लोकार्पण

पारंपरिक जलस्रोतांच्या संवर्धनाला चालना; पंचक्रोशीतील ग्रामस्थ, पदाधिकारी व कार्यकर्त्यांकडून आमदार लंघे पाटील आणि पालकमंत्री विखे पाटील यांचे अभिनंदन

पिचडगाव | प्रतिनिधी

पुण्यश्लोक अहिल्यादेवी होळकर बारव पुनरुज्जीवन व पुनर्वापर प्रकल्पांतर्गत पिचडगाव येथील जिल्हा परिषद शाळेच्या मैदानातील ऐतिहासिक ‘मुक्ताई बारव’चे लोकार्पण आमदार विठ्ठलराव लंघे पाटील यांच्या हस्ते उत्साहपूर्ण वातावरणात संपन्न झाले. ऐतिहासिक वारसा जपत पारंपरिक जलस्रोतांचे संवर्धन, पुनरुज्जीवन आणि पुनर्वापर करण्याच्या दृष्टीने हा उपक्रम महत्त्वपूर्ण ठरला आहे.

आपल्या पूर्वजांनी निर्माण केलेल्या बारव, विहिरी आणि अन्य पारंपरिक जलस्रोतांमध्ये तत्कालीन जलव्यवस्थापनाची समृद्ध परंपरा दडलेली आहे. त्यामुळे या वास्तू केवळ इतिहासाच्या खुणा नसून भविष्यातील पिढ्यांना आपल्या पूर्वजांच्या दूरदृष्टीची जाणीव करून देणारा अमूल्य ठेवा आहेत. अशा ऐतिहासिक जलस्रोतांचे जतन करून त्यांचा पुनर्वापर करणे ही काळाची गरज असल्याचे मत आमदार विठ्ठलराव लंघे पाटील यांनी यावेळी व्यक्त केले.

‘मुक्ताई बारव’चे पुनरुज्जीवन झाल्याने इतिहास, संस्कृती आणि जलसंवर्धन यांचा सुंदर संगम साधला गेला आहे. जुन्या वास्तूंचे संवर्धन करून त्यांना पुन्हा समाजाच्या उपयोगात आणण्याची ही संकल्पना निश्चितच प्रेरणादायी असून, अशा उपक्रमांना व्यापक स्वरूप मिळावे, अशी अपेक्षा यावेळी व्यक्त करण्यात आली.

मान्यवरांची उपस्थिती

लोकार्पण सोहळ्यास पुरातत्व विभागाचे संचालक डॉ. तेजस गर्गे, नैनवाला फाऊंडेशनचे मिलिंद वैद्य, सेवावर्धिनी पुण्याचे कार्याध्यक्ष सुहास लुंकड, सचिव सोमदत्त पटवर्धन, पिचडगावच्या सरपंच सौ. उषाताई हजारे, नगराध्यक्ष डॉ. करणसिंह घुले, गटविकास अधिकारी संजय लखवाल, शिवसेना नेते भाऊसाहेब मामा वाघ, , ज्ञानेश्वर माऊली पेचे, नानाजी जाधव, नितीन जगताप, सतीश मुळे, अशोक टेकणे सर, ह.भ.प. माऊली महाराज हजारे, शिवाजीराव शेजुळ, अशोकराव ढगे सर,वाकडीचे सरपंच बंडू उर्फ तुकाराम गायकवाड, ह.भ.प. चैत्रालीताई महाराज (पिचडगाव), आदिनाथ निकम, दिगंबर वाघुले यांच्यासह विविध पक्षांचे पदाधिकारी, कार्यकर्ते आणि पिचडगाव येथील ग्रामस्थ मोठ्या संख्येने उपस्थित होते.

पंचक्रोशीतून अभिनंदनाचा वर्षाव

‘मुक्ताई बारव’च्या पुनरुज्जीवनामुळे पिचडगावसह पंचक्रोशीतील ग्रामस्थांमध्ये समाधानाचे वातावरण आहे. गावचे पदाधिकारी, विविध संस्था व सोसायट्यांचे चेअरमन, व्हाईस चेअरमन व संचालक, सामाजिक कार्यकर्ते तसेच विविध पक्षांचे पदाधिकारी आणि कार्यकर्त्यांकडून या ऐतिहासिक उपक्रमाचे स्वागत करण्यात येत आहे.

ऐतिहासिक वारसा जपण्याबरोबरच जलसंधारण आणि पाणीसंवर्धनाला चालना देणारा हा उपक्रम पुढील पिढ्यांसाठी प्रेरणादायी ठरेल, अशी भावना पंचक्रोशीतील नागरिकांनी व्यक्त केली.

या महत्त्वपूर्ण उपक्रमासाठी आमदार विठ्ठलराव लंघे पाटील यांचे पंचक्रोशीतील ग्रामस्थांकडून अभिनंदन करण्यात येत असून, पालकमंत्री राधाकृष्ण विखे पाटील यांचेही विशेष आभार व अभिनंदन व्यक्त करण्यात येत आहे.

‘मुक्ताई बारव’च्या माध्यमातून केवळ एका जुन्या जलस्रोताला नवजीवन मिळाले नसून, आपल्या ऐतिहासिक वारशाची जपणूक आणि जलसंवर्धनाची जबाबदारी पुढील पिढीपर्यंत पोहोचविण्याचा एक सकारात्मक संदेश या निमित्ताने मिळाला आहे.