बेळपिंपळगावात धर्मध्वज फडकला; गुरुवर्य भास्करगिरी महाराजांच्या हस्ते सोहळा

बेळपिंपळगावात धर्मध्वज फडकला;

गुरुवर्य भास्करगिरी महाराजांच्या हस्ते सोहळा

श्री रोकडोबा हनुमान मंदिरात रक्षाबंधन सोहळा; महिनाभर गंगाजलाने मारुतीरायाचा अभिषेक, अहोरात्र दीपप्रज्वलनाची परंपरा

नेवासा : नेवासा तालुक्यातील जागृत देवस्थान श्री रोकडोबा हनुमान मंदिर, बेळपिंपळगाव येथे सालाबादप्रमाणे रक्षाबंधनाचा धार्मिक सोहळा भक्तिमय वातावरणात पार पडला. यावेळी संत-महंतांच्या उपस्थितीत धर्मध्वज गुरुवर्य भास्करगिरी महाराज व सुनील गिरी महाराज यांच्या हस्ते फडकविण्यात आला.

बेळपिंपळगाव येथील वरघुडे मळ्यात सालाबादप्रमाणे रक्षाबंधन कार्यक्रम साजरा करण्यात आला. गावातील मंदिरात अहोरात्र शेकडो दीप प्रज्वलित करून ते श्रावण महिनाभर तेवत ठेवण्याची परंपरा आहे.

महिनाभर गंगा-गोदावरी, त्र्यंबकेश्वर, नाशिक, गया, काशी आदी पवित्र तीर्थक्षेत्रांहून गंगाजल आणून मारुतीरायाचा अभिषेक केला जातो. या धार्मिक परंपरेमुळे श्रावण महिन्यात मंदिर परिसरात भक्तिमय वातावरण निर्माण होते.

“येथे आल्यावर मन प्रसन्न होते; मंदिरात मोठी चैतन्यशक्ती आहे” — गुरुवर्य भास्करगिरी महाराज

मंदिराला भेट दिल्यानंतर गुरुवर्य भास्करगिरी महाराज यांनी मारुतीरायाचे दर्शन घेतले. यावेळी बोलताना ते म्हणाले की, येथे आल्यावर मन प्रसन्न होते. मंदिरात मोठी चैतन्यशक्ती आहे. येथील ऊर्जा पवित्र असून ही अद्भुत शक्ती असल्याचे त्यांनी सांगितले.

भाविकांशी चर्चा करताना त्यांनी गंगाजल मित्र मंडळाचे स्वागत व अभिनंदन केले. वर्षभर अशीच हनुमान चालीसा मंदिरात सुरू ठेवावी, असे आवाहन त्यांनी केले. दर शनिवारी खिचडी प्रसादाचे आयोजन केले जाते, त्याबद्दलही त्यांनी मंडळाचे अभिनंदन केले.

मंदिर परिसराच्या विकासाबाबत मार्गदर्शन

मंदिरासमोरील इमारत जीर्ण झाली असल्याने ती हटवावी, अशी सूचना गुरुवर्य भास्करगिरी महाराजांनी केली. त्यांनी मंदिर परिसरात सर्वत्र फेरफटका मारून पाहणी केली.

खरवंडी येथे हनुमान मंदिरात होणाऱ्या सतराणी उड्डाणं आदी आरत्या आपल्या मंदिरातही करीत जाव्यात, असे त्यांनी सांगितले. मंदिरातील धार्मिक परंपरा आणि उपक्रम सातत्याने सुरू ठेवण्याचे आवाहन त्यांनी केले.

यावेळी गंगाजल मित्र मंडळातील तरुण कार्यकर्त्यांचा गुरुवर्य भास्करगिरी महाराजांनी सन्मान केला. त्यांच्या भावी कार्यासाठी त्यांनी शुभेच्छा दिल्या.

“मारुतीरायांची कृपा गावावर आणि भाविकांवर सदैव राहील”

बेळपिंपळगावातील धार्मिक परंपरा आणि सेवा कार्य असेच सुरू ठेवावे. मारुतीरायांची कृपा आपल्या गावावर आणि भाविकांवर सदैव राहील, असा आशीर्वाद गुरुवर्य भास्करगिरी महाराजांनी यावेळी दिला.

या वेळी गंगाजल मित्र मंडळाचे उमेश कांगुणे, सचिन सरोदे, सामाजिक कार्यकर्ते चंद्रशेखर गटकळ, धर्मरक्षक गणेश चौगुले, रेवण नाथ कांगुणे, संभाजी शिंदे, योगेश धनक, भाऊ मेहत्रे, गजानन मुंडलिक, संकेत शिंदे, राहुल शिंदे, राम वरघुडे, बाळासाहेब मेहत्रे, सचिन पुंड, नितीन बाराहते, योगेश शेळके, कुणाल शिंदे, राजेश डुकरे, गणेश डुकरे, ज्ञानेश्वर झिंजूर्ड, सचिन तऱ्हाळ, गुरु रविंद्र जोशी आदींसह मोठ्या संख्येने भाविक उपस्थित होते.

श्रावण महिन्यातील दीपप्रज्वलन, गंगाजल अभिषेक, हनुमान चालीसा आणि विविध धार्मिक उपक्रमांमुळे बेळपिंपळगाव येथील श्री रोकडोबा हनुमान मंदिर परिसर भक्तिमय वातावरणाने दुमदुमून गेला.

— खबरनामा न्यूज