🚨 ब्रेकिंग न्यूज 🚨 शासकीय कार्यालयांत नागरिकांच्या फोटो-व्हिडिओ चित्रीकरणावर मोठा निर्णय

🚨 ब्रेकिंग न्यूज 🚨

शासकीय कार्यालयांत नागरिकांच्या फोटो-व्हिडिओ चित्रीकरणावर मोठा निर्णय

अहिल्यानगर जिल्हा परिषदेकडून सर्व विभागांना सक्त सूचना

अहिल्यानगर | प्रतिनिधी

शासकीय व निमशासकीय कार्यालयांमध्ये नागरिकांकडून होणाऱ्या फोटो व व्हिडिओ चित्रीकरणाबाबत अखेर प्रशासनाने स्पष्ट आणि ठोस भूमिका घेतली आहे. अहिल्यानगर जिल्हा परिषदेच्या सामान्य प्रशासन विभाग–१ मार्फत जिल्ह्यातील सर्व खातेप्रमुख, गटविकास अधिकारी तसेच पंचायत समितींना याबाबत सक्त सूचना जारी करण्यात आल्या आहेत.

उपमुख्य कार्यकारी अधिकारी (सा.) राहुल शेळके यांच्या स्वाक्षरीने निर्गमित करण्यात आलेल्या या परिपत्रकात, शासकीय कार्यालयांमध्ये होणारे कोणतेही फोटो-व्हिडिओ चित्रीकरण हे लागू कायदे, शासकीय नियम व मार्गदर्शक सूचनांच्या चौकटीतच असणे बंधनकारक असल्याचे स्पष्ट करण्यात आले आहे.

कार्यालयीन कामकाजात अडथळा निर्माण होणे, गोपनीय माहितीचे उल्लंघन होणे किंवा चित्रीकरणाचा गैरवापर झाल्यास संबंधितांवर तात्काळ कायदेशीर कार्यवाही करण्याचे स्पष्ट निर्देश देण्यात आले आहेत.

हा निर्णय नाशिक विभागीय आयुक्त कार्यालय तसेच निवासी उपजिल्हाधिकारी कार्यालयाकडून प्राप्त सूचनांच्या अनुषंगाने घेण्यात आला असून, नागरिक व सामाजिक संस्थांकडून वारंवार येणाऱ्या तक्रारींची प्रशासनाने गंभीर दखल घेतल्याचे यातून स्पष्ट होते.

परिपत्रकातील प्रमुख सूचना :

🔹 सर्व शासकीय कार्यालयांमध्ये फोटो-व्हिडिओ चित्रीकरणाबाबत स्पष्ट सूचना फलक लावणे

🔹 चित्रीकरणासंबंधी नियमांची माहिती नागरिकांना देणे

🔹 नियमबाह्य चित्रीकरण आढळल्यास कायदेशीर कारवाई करणे

या निर्णयामुळे शासकीय कार्यालयांमध्ये फोटो-व्हिडिओ चित्रीकरणाच्या मुद्द्यावर निर्माण झालेला संभ्रम दूर होण्याची शक्यता असून, प्रशासनाची भूमिका आता अधिक पारदर्शक, शिस्तबद्ध व कायदेशीर चौकटीत स्पष्ट झाली आहे.